O barrio de Santana, en Buchabade, tamén foi obxecto de melloras dentro do plan de actuacións que o Goberno local de Ponte Caldelas está a desenvolver por todo o municipio atendendo peticións veciñais.

O alcalde, Andrés Díaz, visitou as obras de execución dun muro de contención que serve para consolidar o terreo no bordo dunha pista municipal. Deste xeito amplíase a súa sección e facilítase o paso de vehículos. Ao tempo, resólvese o problema cara a unha finca particular.

A actuación estaba sendo demandada dende hai moito tempo e o actual equipo de goberno, integrado polos grupos municipais do PSdeG-PSOE, AVP e BNG, é sensible con este tipo de actuacións, pois atopouse con centos de problemas derivados de augas pluviais e muros de contención ao longo de todo o municipio.

O alcalde subliña que todas as peticións xustificadas están a ser atendidas progresivamente e a veciñanza entende perfectamente que é un labor inxente que vai levar tempo acometer e  resolver. Ademais engade que no Concello de Ponte Caldelas as pequenas obras  se pactan e se acordan nas asembleas que o Goberno local ao completo celebra cos habitantes en cada un dos 33 núcleos de poboación, “sen ningún tipo de intermediarios ou conseguidores”, simplemente por diálogo directo entre os veciños e os seus representantes municipais.